بدأت أمس ورشة بناء الجدار الفاصل على الحدود الجنوبية بين مستعمرة المطلة في الأراضي المحتلة وبلدة كفركلا. وتوقفت أعمال البناء الساعة السادسة مساءً وتستكمل اليوم. نعرض عليكم المواقف وردات الفعل على ورشة بناء الجدار في الملخص أدناه:
المعلم أبو طاني: بلا معلمية، بس الحيط ما بيسوى ومموج وكلو فتال بفتال. عطيني ساعتين وكم حجر هوردير وبعملو وج ورقة باطون ما شايفين متلها بتجلسو وبتجلس أبو.
الناطق بإسم القوات الدولية العاملة في الجنوب: نرحب بالحائط الجديد ونعتبره فرصة إضافية لنلطم به رؤوسنا مع كل إشراقة شمس.
مصطاف من الجنوب ساكن في بيروت: نتمنى أن ينتهي العمل ببناء الحائط في أقرب فرصة ممكنة ليتسنى لنا الفنترة على كعبه في طريق عودتنا من العاصمة بعد سهرات شرب البيرة الأسطورية قبل الويك اند.
نقابة نشطاء التنظير لتحرير الأراضي المحتلة المتفرغين: سنبدأ برش الحائط بشعارات ثورية مر عليها الزمن وبتسوى ربع ليرة فور الإنتهاء من بناء الحائط. ثورة! ثورة! ثورة!
نقابة ناصبي منصات الصواريخ الخشبية: نتوجه بالشكر للعدو الغاشم على بناء الحيط ونتعهد بتوجيه دزينة صواريخ كاتيوشا في اتجاهه في أقرب فرصة ممكنة لتدشينه… لأن الزهق عنا ضارب أطنابو… يعني جيت والله جابك!
الشيف همزي – أمير المقاومة المطبخية الباسلة: نعتبر بناء الحائط استفزازاً غير مبرر وسنرد على هذا العمل الأرعن عبر تفخيخه بطبخة برغل بتفين بزنة ٣ طن.
مواطن جنوبي: ها ها ها والله؟ عم يبنوا حيط؟ لشو؟ ناقصنا حيطان… تعو شوفو الحيط يلي عنا عمي! حيطنا النا منحكي معو ستين سنة وما برد… هون عنا بالمنطقة منسمي “الدولة”.
Photo via elnashra
May 7th, 2012 at 11:13 am
The reality is so sad