ردت وزارة الخارجية في جمهورية الحمص على “همروجة” نهاية العالم ببيان وصلنا فجر اليوم:

“سارت شائعة حول العالم في الأشهر القليلة الماضية مفادها أن نهاية العالم ستكون في ٢١ ايار ٢٠١١. وهنا علامات النهاية (كما يتم ترويجها)، في القائمة أدناه:

بنوك ستواجه مآزق مالية وسيتم دمج أو إقفال بعضها ✔ موجود!
تعليق الوزير: هيدا بلشت من زمان هون؛ كل ما حدا بدو يبعت رسالة للمقاومة المطبخية، بهز بنك وبسكرو. رغم كل شيء، إحتياطي الذهب عنا كتير منيح، بس الشعب &^٪$# إختو – شكلو مش قادر يتحمل الدكة.

سوف تستنفد المواد الغذائية من السوبرماركت ✔ موجود!
تعليق الوزير: إنو إذا ما في بامية اليوم، منعمل لوبية. منيحة اللوبية شو بها؟! ومش ضروري يكون في مقادم متوفرة ٢٤/٢٤. بس أهم شي يضل في ماء “Perrier” لأنه الطبقة المخملية بتستعملها للقضي.

ستنقطع الكهرباء ✔ موجود!
تعليق الوزير: يعني شو هل إكتشاف! برافو وعفاكن! إنو بدا تنقطع الكهربا؟! ما هي مقطوعة عنا خلقة، وقطعت نسلنا معا! بتروح وبتجي. وبس تجي، بتجي مثل يلي شامم ريحة. وبس تروح، بتروح و ما بتعود تجي كأنها لا راحت ولا اجت!

سوف تنهار الأسواق المالية ✔ موجود
تعليق الوزير: نحن أصلاً ما عنا أسواق مالية أو بورصة – يعني غرفة فيها كمبيوتر عمره ٢٥ سنة بيشتغل على الكاز لا تعتبر بورصة – البعيد! والحلو إنو كل ما شي تليفزيون بدو يحكي عن الأسواق المالية المحلية، بروح وبصور الغرفة من وراء الزجاج! شو مختبر معقم هو عم يلاقي علاج للسرطان ومش لازم يتلوث؟ ما القهوة، قهوة. والدخان، دخان. والكمخة واصلة للركب!

ستتوقف الهواتف عن العمل ✔ موجود!
تعليق الوزير: وتتوقف! بركي بتخف حوادث السير. وأحلى من هيك، بركي بخف التنسيق بين إخوات الملايكة يلي ناوية تخطف أو تفجر وتركب شي إمارة جديدة.

أسعار البنزين ستصل إلى أرقام خيالية ✔ موجود!
تعليق الوزير: وصلت من زمان ومش ناطرين نهاية العالم. نحن أصلنا سابقين زماننا وما مننطر حدا. وإذ نطرنا حدا شي ثلاث ثواني، بتنهار اعصابنا ودغري اليد “بتتحد” مع الزمور حتى يصاب الجميع بالصرع النصفي الدائم.

وإستناداً إلى علامات النهاية (كما يتم ترويجها)، فإن نهاية العالم حصلت في جمهورية الحمص منذ أكثر من ٢٠ عاماً ومش ناطرين حدا. فنرجو من الجهات المعنية التوقف عن بث الشائعات كيفما كان؛ فنحن كنا وما زلنا نعيش نهاية العالم كل دقيقة منذ أكثر من ٢٠ سنة، وهيانا، ما حدا بو شي… بس في شي ٣ مليون هاجروا والباقيين بسفو “زاناكس” مثل الهليون، وبيعملوا حدو رز كمان!”

إنتهى بيان الوزارة

المقال نهاية العالم اليوم من جمهورية الحمص, هو المرخص لها بموجب المشاع الإبداعي نسب - غير تجاري - لا اشتقاق 3.0 الاصلية الترخيص, بناء على العمل الذي Creative Commons Attribution-NonCommercial-NoDerivs 3.0 Unported License. الاذونات الخارجة عن نطاق هذا الترخيص قد تكون متاحة في www.hummusnation.net.